ராமநாதபுரத்தில் கடந்த 23 ஆண்டுகளுக்குமுன் காணாமல் போன மீனவர் ஒருவர், தற்போது மனநலம் பாதிக்கப்பட்டு இலங்கையில் சுற்றித்திரிவது தெரியவந்துள்ளது.

கடந்த 1996-ம் ஆண்டு கடலுக்கு மீன்பிடிக்க சென்ற தங்கச்சிமடத்தைச் சேர்ந்த பரதன் என்ற மீனவர் மாயமானார். அவரின் நிலைமை என்னவானது என தெரியாததை அடுத்து, பரதன் காணாமல் போன அந்த நாளை, அவரது இறந்தநாளாக உறவினர்கள் அனுசரித்து வந்துள்ளனர். இந்நிலையில், இலங்கை யாழ்பாணத்தில் இருந்து வெளிவரக்கூடிய யூ ட்யூப் சேனல் ஒன்றில், கொழும்பு பகுதியில் மனநிலை பாதிக்கப்பட்டு, பிச்சை எடுப்பவர்களின் புகைப்படங்கள் ஒளிபரப்பாகியுள்ளன. 

அந்த காணோலியில் ஆட்டோ ஓட்டுநர் ராஜேஷ் என்பவர், மாயமான பரதன் இருந்ததை பார்த்துள்ளார். இதனையடுத்து ராஜேஷ் பரதனின் உறவினர்களிடம் இதனை தெரிவிக்க, அவர்கள் அதிர்ச்சி அடைந்துள்ளனர். மேலும் புகைப்படத்தில் இருந்தது பரதன் தான் என்பதை உறுதி செய்த உறவினர்கள், அவரை மீட்டுத்தரக் கோரி ராமநாதபுரம் மாவட்ட ஆட்சியரிடம் கோரிக்கை மனு அளித்துள்ளனர். இச்சம்பவம் அப்பகுதியில் நெகிழ்ச்சியை ஏற்படுத்தியுள்ளது.

Source : WWW.PUTHIYATHALAIMURAI.COM

….

Source: Pudhiya thalai murai

Read More >> காணாமல் போன மீனவர் மனநலம் பாதிக்கப்பட்டு இலங்கையில் திரியும் பரிதாபம்