மகளிர் தினம் – தலைவர்கள் வாழ்த்து
tami nadu March 8, 2018,
மகளிர் தினம் கொண்டாடப்பட உள்ள நிலையில் பல்வேறு அரசியல் கட்சி தலைவர்கள் மகளிருக்கு வாழ்த்து தெரிவித்துள்ளனர்.
இது குறித்து அதிமுக சார்பில் முதலமைச்சர் எடப்பாடி பழனிசாமியும், துணை முதலமைச்சர் ஓ பன்னீர்செல்வமும் இணைந்து வெளியிட்டுள்ள வாழ்த்துச் செய்தியில், பெண்களின் வளர்ச்சிக்காக அதிமுக பல்வேறு திட்டங்களை செயல்படுத்தியுள்ளதை பெருமிதத்துடன் குறிப்பிட்டுள்ளனர். பெண்கள் வாழ்வு மேம்படவும், பெண்ணுரிமையை உறுதிப்படுத்தும் வகையிலும் ஜெயலலிதா செயல்படுத்திய அடுக்கடுக்கான திட்டங்களால் தமிழகமே முன்னோடி மாநிலமாக திகழ்வதாகவும் தெரிவித்துள்ளனர்.
நிர்பயா நிதியை முழுமையாக செலவிடவும், நாடாளுமன்றம் மற்றும் சட்டப்பேரவைகளில் பெண்களுக்கு 33 சதவீத இட ஒதுக்கீடு விரைவில் கிடைக்கவும் திமுக தொடர்ந்து போராடும் என அந்த கட்சியின் செயல் தலைவர் மு.க.ஸ்டாலின் தெரிவித்துள்ளார்.

பாரதிய ஜனதா மாநிலத்தலைவர் தமிழிசை செளந்தரராஜன், நாட்டில் மகளிர் முன்னேறி, நாடு முன்னேற வேண்டும் என்றும், அனைத்து வீடுகளிலும் மகளிரின் மகிழ்ச்சி உறுதி செய்யப்பட வேண்டும் என்றும் வாழ்த்து தெரிவித்துள்ளார்.
பெண்களின் மாண்பைக் காக்க தமிழகத்தில் முழு மதுவிலக்கு அமல்படுத்த வேண்டும் என மகளிர் தினத்தில் சூளுரைப்போம் என மதிமுக பொதுச்செயலாளர் வைகோ வாழ்த்துச் செய்தி வெளியிட்டுள்ளார்.

பெண் விடுதலையின்றி சமூகத்தின் முழுவிடுதலை சாத்தியமில்லை என்பதனை நாடு உணர வேண்டும் என இந்திய கம்யூனிஸ்ட் கட்சியின் மாநில செயலர் முத்தரசன் குறிப்பிட்டுள்ளார்.
கல்வி, வேலைவாய்ப்பு, அசியல் என அனைத்து இடங்களிலும் பெண்களின் சமஉரிமைகள், வாய்ப்புகள் பாதுகாக்கப்பட அரசியல் சட்டத்தில் திருத்தம் கொண்டுவரப்பட வேண்டும் என மகளிர் தின வாழ்த்து செய்தியில் இந்திய ஜனநாயக கட்சியின் நிறுவனத்தலைவர் பாரிவேந்தர் வலியுறுத்தியுள்ளார்.

மகளிர் சுதந்திரமாக, மன நிறைவோடு, மகிழ்ச்சியோடு, பாதுகாப்பாக, நல்வாழ்க்கை வாழ இனி வரும் காலம் வழி ஏற்படுத்திக்கொடுக்கும் என்ற நம்பிக்கையோடு, தமிழ் மாநில காங்கிரஸ் தலைவர் ஜி.கே.வாசன் மகளிர் தின வாழ்த்து தெரிவித்துள்ளார்.
Source : WWW.PUTHIYATHALAIMURAI.COM
….
Source: Pudhiya thalai murai
Read More >> மகளிர் தினம் – தலைவர்கள் வாழ்த்து